بنت القـمــر

بنت رقيقة

حلوة جميلة

قالولها انتي مين ؟

قالتلهم,, بنت القمر

-مين أبوك ؟

-مين أمك ؟

قالتلهم ...

النور أبـويا

والعـُلا أمي..

أنا بنت القمر

ضحكوا وقالوا دي اتجننت..

معقول يكون للقمر بنات

سمعنا من زمان عـ الحوريات

وحور العين في الجــنة

انما ان للقمر بنات

ماسمعناش

ردت وقالت انا بنت القمر

بقعد معاه وقت السحر

ويحلى ويــــاه السهر

وأحكي معاه وتطول الحكاوي

وأحيانا نغني ونقول غنـــاوي

ويرجع يغيـــــب..ومافيش مفــــر

اسمعوني..

ده أنا بنت القمر

بنت القمر اللي بيضوي من سنين

بنت القمر اللي علمني معنى الحنين

بنت القمر اللي كان فرحة في عيون كل عاشق

بنت القمر ...ياللي كنت سهم فـ قلبه راشق

أنا بنت القمر

يوم كنت بلعب في الجنينة

مطمنة وملياني السكينة

هب الريح ماعرفش منين

عواصف...زلازل...براكين

الوضع اتشقلب فــ يوم وليلة

رحت لنينة

اتحاميت فيها وبيها

قلتلها ضميني وفــ حضنك خبيني

الأمان اديني.. مش لاقياه

قالتلي ازاي؟؟

نايمة فـبيتك مطمنة

لانتي مهددة ولا مشردة

قلتلها يا نينة

فـين البيت؟؟

فين الدار؟

فـين الصحبة؟

كل ده راح...راح وفـاتني

قالتلي الصبر يا بنتي

ربك بيبلي وبيلطف

مش بيردنا أبدا عن بابه

بس اتوكلي عليه وقولي يارب

قلت يارب

وقعدت أردد ويا النجوم

غنوة جميلة

اسمها... بنت القمر