المكان ...في مطار القاهرة الدولي
الزمان...قبل ماتقوم الطيارة بساعة
حسيت ان قلبي انخلع وقت ما دخلوا المطار
خلاص هيسيبوني ويمشوا
هنت عليكم للدرجه دي
هو انا أنفع أعيش من غيركم
أقدر أفتح عيني من النوم وما ألاقيكمش جمبي
مين اللي هييجي يصحيني لمدرستي..
قصدي الكلية
ماهي اللي خلتني أبعد عنكم
وخلتكم تسيبوني وتمشوا
من يومها وأنا الخوف مصاحبني
اني ما أشوفكمش من تاني
يا أحب خلق الله على قلبي
لقطة من حياتي كانت في دقايق
بس عدت عليا سنين
افتكرتها ...
كنت مفكراني نسيتها
بس أتاريني كنت مخبياها فــ قلبي ورادمة عليها
لاجل ما أقدر أكمل مشواري
*****
لقطة 2
المكان.... في بيتنا
الزمان...وقت ما حسيت الفراق
وانه كل يوم بيقرب عن اللي قبله
وقت ما وقع مني حبيبي
وقت ماربي ربط على قلبي لأجل ما اصمد قدامه
*****
لقطة 3
المكان ...في المستشفى
الزمان... وقت ما استرد ربي أمانته
وقتها عدت عليا كل سنين عمري وكإنها في شريط قدامي
شفتني وأنا بتفرج على شريط سبوعي
وشفتني وأنا بجري وبلعب وياه
وشفتني وهو بيكلمني وبينصحني
وشفتني وأنا فــ حضنه
وشفتني يوم فرحته بيــا
وشفتني وقت ماراح للي خالقه
كنت فــ دوامة
بقيت بصبرهم على فراقه
وأنا اللي قلبي بيكتم ألف آآآآه جواه
بيصرخ وما حدش سامعه
*****
لقطة 4
المكان ...في بيت جدي
الزمان...وقت سفرك يا أمي
كده ياماما تسيبيني وتمشي
مش كفاية بابا سابنا وراح
بقيت بداري منك دموعي
ودموعك سابقاها
عيوننا بتتكلم وما بننطقش
مافيش كلام يتقال
هتوحشيني؟؟!!
طب ما انتي واحشاني من قبل ما تمشي
بحبك؟!!
ده قلوب الدنيا كلها ماتساعش حبي ليكي
ومشيتي وخدتي وياكي روحي
*****
لقطة 5
المكان في كليتي
الزمان...وقت مناقشة مشروعي
حسيت الفرحة فيكي
والبسمة مافارقتش عنيكي
يومها كنتي طايرة من السعاده بجناحين
يومها حصدتي يا أمي نتيجة تعبك
يومها قلنا ده يومك يا بابا ...
كنا حاسينك معانا ...
وانت أكيد كنت حاسس بينا
*****
لقطة 6
المكان في إحدى قاعات الفنادق
الزمان...يوم تخرجي
يوم ما سبتي الدنيا وجيتي عشاني
يوم مارميت الطاقية
وحسيت اني برمي معاها كل تعبي اللي فات
يوم ما قلنا البشمهندس أهه
لقطات من عمري
عايشة جوايا يا أمي
عارفة يا أمي
نفسي أخلص اللي ورايا وأجيلك
نفسي أسابق الأيام والشهور
نفسي أفتح عيني وأغمضها ألاقيني قدامك والاقيكي معايا
نفسي نتجمع أنا وانتي واختي
نفسي اريحك
نفسي أصحى كل يوم الصبح على ابتسامة منك
لينا يوم يا أمي
محدده رب العبـــاد
يوم نتلاقى فيه
وأوعدك يا امي...
ان يومها..هتكوني فخورة بيا
ورافعة راسك فوق
يومها هتبقى الإيد في الإيد
و مش هسيبك تاني أبدا
هضمك بعيني وهقفل عليكي
وأحطك بقلبي
وأقوللك
بحبك يــــــــا أمي
