نسمه بنت صغيرة
قطقوطة ومغندرة
تصحى كل يوم الصبح
تصبح على أهلها
تدي لماما بوسه عالخد ده والخد ده
وتدي لبابا سكرة
تقعد تفكر في الخلق والكون
وتقول سبحانك يارب
وفي يوم ...
حست احساس غريب
حست انها مش هي
وسمعت صوت عربية
لقت اللي غايب رجع من بعد الفراق
ضمته أوي
وكان نفسها تفضل معاه طول العمر
لكن ده مقدر ومكتوب
ومافيش منه هروب.
نسمه بنت صغيرة
قطقوطة ومغندرة
نسمه مرة سألت بابا يعني ايه موت
ويعني ايه فلان مات
قالها انها حياة تانيه
بس هي ما استوعبتش
نسمة بنت صغيرة
قطقوطة ومغندرة
كانت نسمة بتحب البحر
تقعد تلعب على رماله
وتبني قصور ..
وتيجي موجه تهدها
وتقعد تعيط
وييجي بابا يقولها
ما تبنيش على الرمل
لازم اول تحطي الأساس
علشان ما يجيش اليوم
اللي تندمي فيه على حاجه فاتت
وعلى وقت ضاع
نسمة بنت صغيرة
قطقوطة ومغندرة.
مرة نسمة كانت متدايقة
حزينة وزعلانة
بابا بصلها لقى الدموع بتجري في عنيها
سألها عن السبب
قالتله انها نبتتها ماتتمع انها كانت بتسقيها..
بصلها بكل حنية الدنيا وقالها:
لما نزرع بذرة لازم نرعاها...
ما نديهاش مية اكتر من حاجتها
وما نموتهاش من العطش
نقومها اول باول علشان تطلع مستقيمة
ونعرف ان رعايتنا ليها سليمة.
نسمة بنت صغيرة
قطقوطة ومغندرة
مرة نسمة كانت تعبانه
وحرارتها مولعه
راحت لماما
وماما ضمتها في حضنها
نسمة حست بتيار بيسري بينها وبين أمها
ولقت التعب زال
والحرارة خفت
بجد والله حقيقة
دي مش تلفيقة.
نسمة بنت صغيرة
قطقوطة ومغندرة.
نسمة شافت عصفورة
قطقوطة وصغيورة
مسكتها لقتها بتنتفض من الخوف
حطتها جوة القفص
بصت لقتها حزينة بتبكي
قالتلها: بتبكي ليه يا عصفورة
مع انك لسه صغيورة
مافيش هموم مدايقاكي
ولا حبيب رحل عنك
بصت لقتها بتحاول ترفرف جوه القفص
فتحتلها الباب
وقالتلها طيري يا عصفورة
بس ما تنسيش تزوريني.
نسمة بنت صغيرة
قطقوطة ومغندرة
وكبرت نسمة ..
وكانت كل يوم بتقعد تفكر في المغربية
وتبص لقرص الشمس وهو بيغيب
وفي مرة طرأ على بالها سؤال
ليه ياترى بنحب الغروب؟؟؟
مع انه نهاية
وليه بنحب الليل ؟؟؟
مع انه سكون
هل يا ترى...حد يقدر يجاوبها ؟
على أسئلة محيراها
مسهراها
ليه بنحب؟
ليه بنفارق؟
ليه بنتعذب؟
ليه قلوبنا دايبة من الفراق؟
ليه بنتمنى اللـُّــقا؟
